Tibak cherita novel

KEMAYANG PENGERINDU

Tusun 9 

Malam nya orang semampai mayuh ngulu tudah tuai, enda pen nanyaka berita ngagai iya, sida sama sida berandau nanyaka berita ngagai pangan. Enti berandau enda nemu ngetu, enda nemu badu. Jerita enda nemu ambis, enda dapat pen angkat, lembau pen ngeredayau, pendiau semampai regas, mimit enda meh mata deka ngantuk enti sebutka nunga temuai.

Telap malam makin chelap. Aruh iya, jam dekuan Andit benung nunjukka pukul dua belas. Orang ke nunga udah ambis pulai. Kelita tunga ke punggang setak ulu udah ambis padam, baka nya ga kelita ke setak ili. Nyawa radio di bilik sida Limah nadai agi didinga, kengka utai ti agi didinga semina nyawa kuang kebat enggau nyawa burung puk aja ke agi bekechaie merindang malam. Nambahka penyunyi, uduk nadai ga berekak sebelah ruai.

Novel tu bisi 19 tusun. Penebal 380 rambal. Dichelak Ogos 2005 lalu udah ambis dijual bisi 8500 unit. Rega : RM16.00 Sais : 8 X 5.5 inchi Mesan novel tu, KLIK

Meda malam sunyi, Wil nganchau tilam kapuk tebal tiga inchi. Udah tilam dipampu-pampu enggau repik kayu, iya lalu ngantung kibung belachu chap kunchi. Udah nya iya gali nganti ke mupuk ke ulu. Bakih Punjab duduk nyerurka dilah ngemansutka riur ke bentali nitik ke tikai. Nyadi Andit duduk nyerungkung di tisi kibung, nengkadah ke atas nyepuka asap insap ke sadau. Ngenang utai ti jauh enggau utai ti semak, ngenang orang ti tuai enggau orang ti biak, ngenang bala sida wai sulu enggau Melia Luya ti tinggal di Emperan Semah bebatu merekah tingkah tebiang.

Nyau kepepuas merening Punjab ti sengih-sengih duduk di tisi peninduk, Andit datai gidan.

“Punjab! Uji nuan tinduk jauh agi, belakang nuan nya bau kaka,” ku iya, kaki numpu belakang. Ensepi kena tumpu Punjab pen angkat lalu gali ba palan iya empu di kaki tilam, mua nunga ke baruh, burit disuika iya ngagai mua Andit baka ke sengaja malas dendam bekau udah kena anu.

“Nya..aaa dia baru betul, tu enggai enda besulu enggau mensia, ukai nuan nya mugan baka danau tungku duduk,” ku Andit beduan. Lalu tinduk meh iya enggau gaya peninduk uduk.

Jam semak pukul satu, Andit beradu, misin buk, ngentun bulu idung, ngeruk kerak idung, nyimpulka tajung lalu berunsut enggau jayau ke diberi akih iya Pungan. Ensepi chukup sigat asai sepi anak ati din, iya pen bejalai belubah-lubah ngelawa pugu tanju nengkilaka bala sida Entinga sebuat tang deh bala sida nya lalu enda datai.

“Kati alai bala sida tu lalu enda datai-datai, enti sida iya bisi baru nyamai ngayap, mayuh teril. Bisi enggau begagai, bisi enggau bebuti. Ah! Siku pen ngayap meh,” ku iya bejaku dalam ati diri sambil nyelentikka papung insap ke langit. Meda bala sida nya lalu enda datai-datai, iya lalu bejalai nuju ruai sida Sendi.

Datai di tempuan silakka iya pintu, pintu kekinyik laban insil betegar. Enggaika ngeregau, Andit pen beludah, mantaika pengelaman iya di menua, udah nya ai ludah kena ngunsut insil. Udah insil basah nya baru iya enda udu memunyi. Taja agi memunyi tang enda ngeregau, enda ngachau, enda ngenanika orang ke benung tinduk jenak, benung tinduk nyenyak. Enggi sekeda orang, insil pintu enti memunyi, dipanching kemi tang Andit enda sampai baka nya.

Tekala ngeju ke pintu iya pen nilik. Peda kibung indu dara rerenjung di atas ruang bilik. Sigi baka indu dara, sida iya ka agi tinduk di atas, semak dinding sabar ai. Meda peninduk jauh ke atas, Andit betunjik ngelawa kibung Sendi. Senario ngelingi kibung indu dara di serata menua Iban sebaka. Peninduk, kelimpah ari ti diias enggau bemacham gaya, diunsut mega enggau minyak rundal macham jenama. Nya ke ngasuh bau iya ngaba amat, ngenambahka pemau tubuh ti seruran romantik. Pasal pemurak enggau pemeresi peninduk anang nyebut. Baka nya ga peninduk endun Sendi, nadai pengurang ari semua aspek.

Datai dia, iya lalu beguai nyilakka kibung. Silak, peda iya Sendi tuchum meda mua iya baka ke sigi nganti penatai. Sendi bebaju panjai lengan mipau, bedandung gadung bebungai okid, pending besumpin mit, bejam kuan betinchin mas alus tang ganggam. Kesuh nyawa semampai ngemansutka bau rengut, dini enda, semesai-mesai rampa gusi enggau semua lupak di selepak ngeli dikeruin enggau ubat ngeli gibs berari-rari.

Ari senawas panchar lampu, dipeda ngeli iya ti burak-burak, taja enda rata tang nadai ngenyaika gamal iya. Pisin buk dipaut ninggang pending kiba. Taja semua buk ninggang pending tang senawas sumpin agi ga bisi ayan betekilap baka indu sepepat ke inggap sebelah puchuk enteberu nebing sungai Lais.

Nganta sebedau tinduk sigi trend indu dara di rumah panjai ukai ketegal nganti sida punggal datai. Enda pen sida iya digayap orang, bemake-up meh sida iya sebedau tinduk. Ketegal ti semampai ngias diri sereta enda ngalau bulu kechiak, nya ke ngasuh indu Iban nadai bau kenas, nadai bau peluh, nadai bau peku getah sampaika peninduk pen bau rengut. Beradu sebedau tinduk sigi udah tradisi ari kelia menya sempama rutan tampung danan, sempama wie tampung tali.

Meda indu tak tuchum, Andit gaga lalu nudukka diri seraya mulut bejaku begadai-begadai.

“Enda aku ngerak nuan wai Sendi, nuan ga udah dani. Tan endar mata nuan enda tetinduk, nya baka malam udah melunggang ke pagi.”

“Ba iya wai, mata aku tak enggai tetinduk, baka ni kati pen aku mejamka mata, enggai meh ngantuk,” ku iya nyaut sambil ketawa.

“Enda chelap nuan tinggang ujan tengah ari tadi wai?”

“Ukai enda, nyau migak-igak bai bejalai. Tengut-tengut asai tulang dipangkil penyelap. Seduai Miya nyamai, enda berasai chelap laban bisi utai ngasuh angat,” ku Sendi beduan Andit.

“Diatu agi ga tubuh nuan chelap?”

“Agi, tambah jerumat jam diatu benung melunggang ke pagi.”

“Bisi jalai muntang kena ngangatka tubuh wai, kelimpah ari bekindu,” ku Andit madah sambil murus berang ari bau sampai ke tapa.

“Eh! Enda tau,” ku iya, mata merening sambil ngiarka jari.

 Andit enggai beperening mata laban iya ingatka diri diasuh Limah Anak Kungkam mai tengkira enggau piring enti ngayap ngagai indu rumah nya. Pendiau dalam kibung enda sebaka enggau pendiau dalam babas. Maya begayap, enti indu nganu, apai indai iya dani, enti iya nyerauh semua orang ngesah. Meda siku nya lalu enda angkat iya pen nanya sambil narit, “lapa alai nuan enggai berandau duduk enggau aku wai Sendi. Ukai nya pulaika penyalah deh enti tua sama duduk.”

Ninga umbuk Andit, Sendi ngeliat, mampul mulut, nguap. Udah nya angkat sama berimbai duduk, nawis lalu nelai.

“Wai Andit, amat pulai seduai Wil pagila?”

“Amat,” saut Andit enggau ati gaga, ukai gagaka nama tang gaga meda indu deka berandau duduk. Reti nya, enda sumbung. Udah nya Sendi pen nampung jaku, “agi belala meh kami begulai enggau seduai Anggat Wil enti seduai nyadi pulai pagila.”

            “Nadai ku enggau meh, ila aku datai baru ngabas bala kita ditu. Enti agi pejalai moto dua jam ukai nya jauh, neh iya pejalai kaki sari aku sanggup ngelawa,” ku Andit beduan.

“Eeh! Anang beila-ila wai, ni pengelama ila, ukai ila nemu datai.”

“Enda nemu pengelama meh, dia maya aku datai, nya meh pengelama ila. Kita serumah enda tusah, bala sida bakih ari ili selalu datai merindang ati bala kita,” saut Andit enggau jaku keduan.

            “Eeh, kami serumah tu jarang deka besulu enggau bala sida unggal ari ili nya, engka bisi ga siku dua iku kini.”

“Nama penyalah bala sida nya deh?”

“Nadai ga penyalah, engka laban ke selalu bepeda nya alai nadai ati keran ke pangan.”

“Kati baka aku deh?”

“Nuan sama meh baka sida nya nadai utai bangat spesial ti tau ngerinduka ati tang alai ke ngenan laban rindu begulai, rindu besulu, enda lebih ari nya,” ku Sendi, mulut ngeringikka Andit. Udah nya iya pen nambah.

“Wai Andit, sepagi-pagi tadi kitai begulai ngembuah tang aku lalu enda nemu asal enggau purih nuan amat semina aku ninga mimit ari indai. Nama amat nuan pen aku enda nemu, semina ke nemu nama nuan nya Andit anak Kendawang.”

Ninga peminta siku nya iya pen nyaut, “nama kebuah nuan deka nemu nama aku deh enti aku nadai utai spesial?”

            “Ni kitai nemu Andit, engka pagila lusa tua betemu.”

            “Nama aku Andit, Johnny Andit Kendawang, nama gelima aku John. Aku agi mit dikeduan orang enggau nama Sali, Salui iya meh. Sali enchegi nangga ari datai ari tisi langit besundang. Menua kami ba Emperan Semah batu merekah tingkah tebiang, di ulu Sungai Rungan endur ikan ngaban dialun gelumbang. Aku anak keenam ari tujuh iku diri menyadi, lima udah belaki bebini. Kami duai ke biak aja meh bedau bisi orang ngempu.”

“Kati ku nuan nguai ke orang wai?”

“Kati alai nuan beguai nanyaka utai nya. Ke bendar, aku enda diasuh indai nguai ke orang. Tang enti indu enggai ditarit, enggai dibatak, ka pen enda nguai, laban meh jaku indai asal juluk ati tejapai.”

“Sigi aku ka nemu.”

Iya meh udah lepa mimit, “sapa nama amat nuan wai Sendi?”

“Nama aku Lupa, dalam tingki Lupa anak Igu tang Sendi Lupa ti tampak agi. Kami menyadi mayuh tang aku dasuh sida indai ngibun bilik. Enda tau sekali-kali nguai ke orang, ka ke nama, ka ke dalam ni pen chinta, enda meh nguai.”

            “Enti baka nya manah aku namaka diri wai, tetenguk bendar ga asai ati deka nyelat kita serumah,” telai Andit.

            “Eh! Anang ngayahka aku. Ukai enggai, aku enggai ngelampat mua aka Miya, aka Miya bajik agi,” ku iya sambil ngejuka kening Andit. Ensepi kena ju iya lalu migai jari Sendi.

“Kati alai nuan bejaku munyi nya, ati aku ngagai kita tiga sebaka Sendi, enda milih. Kami enda baka kita ke indu, enda milih Kumang enda milih Lulung, budi basa ke digiga, pementas nya numur dua.”

“Enti baka nya ambi ga siku ari kami tiga,” ku Sendi beduan.

“Enti baka nya, nuan dulu dilawa, nuan ga ke dempu aku.”

“Mmmh, anang mayuh macham wai, nama aku meda seduai Miya intim agi peda aku, pengerindu ka nyadi dibagi?” ku iya sambil ngeleka ke jari Andit.

            “Pendiau aja besulu, ati mensia enda ulih bacha enda baka ati jani.”

“Lama ga tua udah berandau, aku udah ga nemu nama nuan, nuan udah ga nemu nama aku, alai meh nuan ngelawa aka Miya enggau aka Lulu enggaika seduai iya nyabak nganti penatai nuan,” ku Sendi sambil ngejuka jari Andit.

Andit enda bedulika ju indu tang majak ngeluyar kena ngelamaka diri. Penyelai iya, ke mayuh agi ba sida ke ngayap, nyengkaum Andit, ngembuan mua tebal, nya alai mimit nadai meh nemu malu.

“Tau aku kitu baru wai Sendi?”

“Tauuuu, nadai pemali, bilik kami enda kala diujakka remak pagar api, ruai kami enda kala dipantangka manang enggau menira penti pemali, rumah panjai kami enda kala endur temuai datai sandau ari. Kala nuan aktif amat ngayap, apuska rumah kami tu ari puting setak ili sampai ke puting setak ulu, ni nemu nasit manah bisi orang kasih ke nuan.”

“Kemaya aku tau kitu deh?”

“Pagila lusa, enggau pengelantang nuan meh tang enda gerinti….,” ku iya madah sambil ngeju ngasuh pansut.

Ensepi diri deka telentang, Andit angkat ninggalka kibung. Kaki nyingkang tenjik-tenjik enggaika geregar memunyi. Silakka iya pintu tekam chura kunyit baka menira Rajah Brooke, bejalai nengah ruai lalu bediri di pugu tanju. Ambi insap segupung sebatang lalu nginsap ba pantar sida Lulu Entema. Ambis insap, iya pansut ke tanju tinggang terutu ujan ngerunung, bediri degi-degi besampi bechekak punggung, nengkadah ke langit mit mesai kepit bingkai sintung, mata merening senawas bintang selepak tekang remang begantung.

Serentak enggau nya iya mega tekenang, “nyelai ga adat ngayap, ka kitai ngumbai belalai, enda ga nya laban apai indai indu nemu. Nama penyalah enti kitai betemu siang ari. Jemah ila sigi ketawa bala sida ti tuai ngenang ke bediting tengah malam,” ku iya sambil tuchum.

Udah tubuh gelesi, baru iya mulaika diri ke ruai sida Wil. Malam mansang sunyi, utai nadai agi didinga semina nyawa burung puk ke seruran chaie-chaie ngibur malam. Betimbal enggau nyawa burung ti chaie-chaie tama pending, mulut Andit kekemut, “kini ke peduman luan aku tu aki Tedong?” ku iya nyapa dalam ati, “ngelawa Miya ka sekalika ngelawa Entema, sekalika pulai tinduk?”

Seraya bepikir, jari ngaru litan lusung ba pah, mulut kekepus nginsap kena merindang ati ke seilu-ilu ngenang Ini Andan. Ambis insap dua batang baru iya mutuska diri deka ngelawa Lulu dulu.

“Aku tu enda salah-salah baka nyumbuh tunggal semina ke enda beiku, sida akih Entinga bedau ga datai. Enti bisi tubuh mendua iku baru nyamai ngayap, bisi enggau berandau,” ku ati iya sambil nenggau jam kulat ba kuan.

Tengan nginsap ketiga batang iya bejalai ngelawa tempuan sida Lulu. Silakka iya pintu, peda iya kibung renjung-renjung dua iti sama burak, siti enda jauh ari mua pintu, siti di tisi dinding tunga ke atas ruang bilik. Enda nemu iya ke ni kibung Entema, iya lalu bejalai belelubah baka ke nyubuk empelanduk ke benung duduk di baruh pun buan.

Enggau ati ti agi kesal, jari murus dada, iya lalu ngelawa kibung ti di atas ruang bilik enda jauh ari terabai. Terabai nya bela peninggi bediri beukirka naga, iku beruit bekait bebelit nyengkilung rekung, gamal ringik-ringik baka ti ka ngetup mua Andit.

“Apu! Manah amat terabai nya,” ku ati iya, “enda kala aku meda terabai ngemanah nya. Mayuh ga rumah panjai udah ditiki, bilik udah ditujah, menua udah ditengah enda kala meda terabai bansa nya. Nya ukai terabai kena ngajat, engka kena niang aki sida iya ngayau kelia. Engka terabai bansa tu ti kena pansa leka pengap sida aka ke ngumbai iya, ‘Tatai empa panas ayung sereban, bukit tebiang nemias ayung tegalan, menua pandak entak digantung, kedua bali nama iya Bujang Meragai bejalai ngeliling sakung, enti tikau enggau pengayau enda nginsit ari panggau pala luan, enti Kendawang ngebala orang enda nginsit pedang lantang besuran’.

Udah ngemikirka pengeunik terabai nya iya pen ngenung baka lutung mabuh ipuh, ngetu baka puyu mabuk ambuh, berunding. Datai di tisi kibung iya lalu tepedaka nyabur chudur pengundur bala nyerang, dajap nyapan dirandang, badi Jelenggai rengga-renggai ngenjun lempuang, badi Langie belanggai tinggang, badi Andit seribu rambang. Nyabur nya panjai sedepa dikaitka di tisi terabai.

“Tu sigi kibung Lulu Endun Puyu Bunsu Berujan, Seseluk Benih Tabur Sebulan,” ku ati iya.

Silakka iya kibung begadai-gadai, peda iya Lulu tinduk singit, dandung ngelisi ke atas, baju tebuka kanchin, kaki ngepit gulin. Kuyu lichin. Buk panjai ngelindung pending, taja pia sumpin mas mesai leka marik pelaga agi ga ayan cheli-cheli baka mata antu buyu nyumbuh ke nganti Aki Jelapi manang Jelapan mai pedang lantang besuran niki ke atas perabung beipa deka bepantap. Bau rengut peninduk enggau tubuh indu nya ke ngasuh ati iya majak gidan.

Runding-runding jai sida ke lelaki, ba minda iya majak beterudus ngansak untak bepikirka utai ke enda tentu temu sida ke indu. Perening iya, amat senaya lampu enda tentu terang tang gaya selangkur tubuh Lulu ulih dilaba enggau silik ari kaki sampai ke punjung pala. Tambah agi, api ke makai seku nyau belabuh deka nyelar mau ngagai lalang rangkai pengudah kemarau sebulan lebuh ke meda kain Lulu ti tesilak sampai ke pugu pah. Ati majak gidan. Tambah agi kanchin baju tebuka tambit, nya ke ngasuh munggu tanah pesaka berupai dipeda. Munggu tanah pengerang ke chukup manah diperimba alai bumai.

Udah puas meratika gaya indu tinduk, iya pen duduk ngimbai tubuh Entema lalu ngemeranika diri ngerak, “dani wai Lulu, dani!” Ku iya migai bau sambil nguyat.

Lulu enda sedar. Gerak baru. Udah dua tiga kali tudah tuai nguyat bau, enda ga iya nya dani. Enda liat, paut iya udu-udu sampai telentang, nya baru Lulu engkebut, ngusuk mata lalu bejaku enggau tiun nyawa meresu sambil ngeju, “sapa di kechai datai ngerayap, sapa di gerinang nunjang enda beradat, sapa nuan tu buau berani ngachau aku tinduk jenak, sapa nuan tu mayau berani ngeramak aku tinduk enda engkasak, sapa nuan tu antu gambi ngerak aku tinduk nyenyak, pulai alai! Badu kitu,” ku iya nganu sambil narit dandung nutup landai emperan lalai, kain sarung pengelindung tatai. Jari sepiak ngejuka tubuh Andit lebuh mata agi pejam.

“Aku tu, Andit, iga nuan enggai meda gamal aku dulu,” ku tudah tuai. Sereta ninga nyawa Andit, iya pen ngenchelakka mata. Peda iya Andit duduk jejangah di tisi iya baka buyah ke ngerejah api, duduk entap baka nyumbuh ke deka nguyaska tebu betung.

“Ayeee! Nuan wai Andit?” ku iya tekenyit, ati semadi deka bejaku, mulut semadi deka nyebut, ngerara semadi keranjur.

“Au aku meh tu, Andit datai ari langit mit mesai kepit bingkai sintung. Kedua bali nama, Sali enchegi nangga ari datai ari tisi langit begantung,” ku Andit ngaga nama diri munyi nama orang Panggau.

“Jenak amat meh aku tu tinduk tadi, engka laban lelak bai ngema buah kini,” ku Entema bejaku meresu sebuti ti didinga.

“Enti ulih bai duduk, duduk meh berandau enggau aku enda lama. Kala kitai baru begulai, baru betemu, tu meh peluang berandau enggau pangan. Taja pen tua udah begulai sari dua tu tang tua enda berandauka utai lebih dalam,” ku Andit madah sambil murus berang. Ninga umbuk Andit, Lulu lama enda nyaut baka ke dalam dilema. Udah bulih alas baru iya nelai enggau basa ti manah.

“Mmm! Ukai enggai aku berandau enggau nuan wai, mata aku ka amat tinduk. Pulai meh nuan dulu, anang ngachau aku, ila tua berandau baru,” ku iya sambil ngejuka Andit. Bedau sempat Andit nyaut iya pen nampung jaku, “manah nuan ngelawa Sendi enggau Miya alai,” ku iya. Mata setengah pejam sambil mampul mulut ke rerangap bai nguap.

Ninga siku nya ngansak pulai, Andit lalu nyaut enggau jaku sinu.

“Udah aku ngelawa seduai iya. Seduai iya baka nuan meh, ngeju ngasuh pulai bedalihka pengelelak,” ku iya nyaut, mata merening kuyu Tema ti pelu-pelu baka kuyu mannequin. Taja pen tudah tuai bemegahka nama munyi nama sida Aka Sebila Daun Sabang, mimit nadai meh ngasuh ati Entema tekait, telah agi deka berandau lama, gaya muru pulai ga enda berapa bebasa. Enda nyamai asai dansak orang pulai iya pen angkat ari kibung, bejalai belubah-lubah enggaika didinga Gimbat. Datai di pugu tanju iya pen nginsap.

“Pui!” ku iya beludah ke tisi, “ngumba ga Lulu enggau Sendi, telah agi deka mai gali, berandau enda lama pen enggai. Teperasa ngapa ati meda reaksi indu jinak,” ku iya nengali bejaku munyi tebaru dulu ujung, muchau munyi Melanau nimbau bangkung. Udah nya bejalai junuk-junuk ngelawa ruai sida Wil. Datai dia iya pen duduk berunding sambil nyirutka asap segerit ke dalam dada, udah nya dikesuh-kesuhka iya begadai-gadai sambil mata kesap-kesap ngetatka pemedi ditepuk asap segerit chap timbak.

“Kati ku aku tu, tinduk ka sekalika ngabas Miya,” tanya iya.

Nyau pemuas nukung ngenang diri ti enda dikibuhka orang indu, ilham pen datai, …“manah aku ngelawa Miya dulu, enda patut………,” ku iya.

Dalam realiti idup, indu Iban enda bangat ngemudah ke disangka….. Andit nemu. Taja pen udah dianu, tang semua utai nya enda ngelemika niat ati iya. Majak deka ngelawa. Kedua, iya deka ngujika pemisa jayau ke dibai bakih iya Pungan ari menua Sambas. Nya alai iya bechayaka jayau ulih nulung. Iya lalu bejalai baka urar matak silui ngelawa tempuan sida Kulih. Sambil bejalai sambil mulut bejelimut besampi. Leka puchau udah disepu. Pui kiba, pui kanan. Anang sabau anang rumbau, pia ku sekeda sampi Andit.

Ati tudah tuai balat gaga laban iya nemu apai enggau indai Miya nadai di rumah. Sapa-sapa pen enti ngayap, rindu meh ati enti nemu apai indai indu nadai di rumah laban tau enda ibuh begadai enti bejalai tama ke bilik.

Iya meh datai ba tempuan sida Kulih, uduk enda memunyi semina iku aja ti kuit-kuit gagaka Andit. Anang agi deka nyalak, tajung Andit disium. Tambah uduk ba rumah panjai jarang deka nyalak mensia, enda baka uduk ti nyaga kebun lada China Puchau di menua Maling, Melatang enggau Serikai. Uduk China kebun enti meda iban mansa, enchunung ngelawa deka ngetup.

Lebuh ke migai uduk, nengkadah ke atas, iya lalu tepedaka ringka antu pala di atas tempuan. Ngarapka antu pala ulih nulung iya pen besampi,

Oh Petara Aki Oh Petara Ini

Oh Petara Apai Oh Petara Indai

Tu aku minta tulung minta pandung

Minta peda minta tengkila

Minta gempuru minta bantu

Laban aku ka siku, nyelat mensia mayuh bansa

Nyelat orang tau tepang

Nyelat munsuh tau munuh

Aku ukai datai ngayah ukai datai bungah

Ukai datai ngeregau ukai datai ngayau

Ukai datai ngemula ukai datai ngapa

Tang datai ngayap enggau ati ke amat

Ka besulu enggau ati ke tegap

Ka jadi enggau ati ti rat

Ka bebini enggau ati ke tetap.

Pia meh ku leka sampi iya tang kada nya amat munyi sampi nya deh tuju ati iya ke bendar, iya aja meh ke nemu. Udah nya iya lalu ketawa bepikir, “eeeh! Nya antu pala munsuh, dini sida iya ka nulung.”

Datai ba mua pintu, silak, sepi pintu sida Miya berat. Berat laban ti ditating apai iya enggau batu mesai pala, tang agi ulih ga silak. Tama ke bilik, peda iya kibung indu dara jauh ke atas, enda berimbai enggau kibung ini iya. Konfiden asai ati, iya pen nyingkang belubah-lubah ngelawa kibung Miya.

“Ragak tau meh, ukai ini iya nya ninga, mata ga rabun,” ku ati Andit.

Laban sigi tradisi, ngayap enda tau ragak. Baka kitai ke nginti, enggaika regau, enggaika jelungan, enggaika ngeregau orang sepiak-sepiak. Silakka iya kibung, peda iya Miya benung tinduk jenak. Aruh iya Miya jenak, jam nyau deka mangkung pukul dua setengah pagi.

“Manah amat bau indu dara tu, tu ukai bau minyak santalia, engka iya bisi ngena minyak rundal chap rachun,” ku ati iya.

Ari gagai seduai lebuh ti pulai ngembuah siang nya meri pengarap besai ngagai ati Andit ke ngujungka iya berani duduk nyendi tubuh. Iya enda ngerak tekala nya tang beratika pemajik mua enggau rangkar tubuh indu tinduk jenak. Runding jai belabuh ngerus-ngerus untak baka ke ngansak iya bepikir jai baru baka runding maya iya ba Lulu sebedau nya. Enda bangat lama udah duduk baru iya nanggung panggal ti kena Miya nudung mua. Enggau pengarap ati ti tinggi iya lalu meremi nebah ruding ba pending siku nya. Ditebah-tebah iya, enda ga Miya dani. Tebah iya inggar agi enda ga siku nya dani. Macham-macham leka jaku pujuk ke disampaika rengung ruding, enda ga tedanika Miya.

“Eeh! Enda nemu ningaka ruding indu tu, palui,” ku ati iya.

Dalam realiti, Andit enda tentu nemu nebah ruding, semina ke nemu ngengguk-ngenggukka ngapa. Nyadi leka jaku ti disebut iya nadai menyana, beketiu nadai beleka. Mayuh agi ti berengangung munyi engkeraju ti dijelentik, merengung munyi sayap indu ridun ti pansut ari lubang tanah. Meda iya nya lalu enda dedani, dipigai iya ba kuyu, dipichit iya dagu lalu diguyat ba bau sambil nelai.

 “Dani wai, dani!” Miya enda dani. Dipigai iya ba kuyu. Tekala jari terengkah, Miya tekenyit lalu ngejuka jari tudah tuai sambil nanya,

“Sapa ke ngachau, sapa ke ngeregau, sapa ke ngimbai, sapa ke migai, sapa ke michit, sapa ke ngempit aku tu benung tinduk jenak, benung tinduk nyenyak, ngerak orang anang meh migai kuyu, anang meh mechal dagu,” ku iya ringat.

Udah nya iya lalu ngerampas panggal ari jari Andit lalu ditudung iya baru ga mua.

“Apu! Amat munyi ku sida akih Gandang, mangah amat Miya tu,” ku iya, enda disebut enggaika Miya ngelala jaku.

Udah nya tanggung iya baru ga panggal ari mua siku nya sambil nanggung sambil michit dagu. Nyepi dagu pedis, Miya enda liat lalu ngejuka Andit. Nama agi deh, telentang meh tudah tuai lalu nuju kibung. Peda kibung Miya nyau ka runtuh. Dini enda, kibung ga semina betalika ribis, ukai nya teguh.

“Amat munyi ku sida akih Gandang, mangah amat indu tu,” ku iya ngeringatka nyawa. Ninga nyawa siku nya, Miya lalu ngenchelakka mata sambil ngeliat. Peda iya Andit duduk jejangah enggau raut mua serius.

Nesal asai ati, iya pen nyebut, “ayee! Nuan wai Andit, enda aku ngadang nuan deka kitu. Nya alai aku enda ngibuhka penatai nuan. Kedua, enda sangka kesulai deka tama ke bilik, manah Belang enda tetangkapka iya,” ku iya, jari megai kuan siku nya, mua sama beperening, mata sama enda engkesap, ati sama degup-degup ngenjun dada. Udah nya iya pen nampung, “kumbai aku bala sida ari ili nyin nuan tadi wai.”

“Kati alai nuan udu ngenang sida nyin?”

“Ukai ngenang nama, sida iya kelalu manchal, enda mereti. Nyau deka ninting malam ngachau kami kitu. Danu pen enda meh malu,” ku Miya sambil murus jari Andit. Udah nya nyebut, “kati alai nuan laun wai, tadi aku nganti. Meda nuan lalu enda datai-datai nya alai aku lalu ngenindukka diri.”

“Nyau ka enda kitu aku tadi,” ku Andit nyaut, jari nyilakka kibung ngaga diri deka pulai. Bedau sempat Miya bejaku iya pen madahka diri deka pulai.

“Pulai aku wai, enda nyamai endar danu orang, enti apai aku digaga orang baka nya enda ga ibuh laban iya semampai ke sengkalan anu orang,” ku Andit madah sambil bejugang ngangkatka diri.

Bedau tepantup ba kibung pala tudah tuai, tajung iya lalu dientun Miya ke ngujungka iya lalu teduduk. Meda tudah tuai teduduk, Miya lalu merap jari sereta minta ampun. “I am very sorry wai Andit, pedis ati nuan?” ku iya nanya.

Andit enda nyaut ngaga diri pedis ati, mata merening mua Miya sampai ke kaki. Meratika baju kubal ti sendat udah ga enda bebra, nya ti ngayanka rangkar tubuh danjang bendar. Tunjuk enggau kukut kaki beresi taja pen iya tiap-tiap hari nulung apai indai gawa di tanah.

“Kati alai nuan ka ngena baju sendat wai Miya?” ku Andit nanya sambil migai baju senentang perut.

“Eeh, enda kala dikena aku baju tu Andit. Aku pen enda meh nemu nama kebuah aku tak ngerasukka baju tu tadi,” ku Miya madah enggau ismu mua ti cheria. Udah nya iya pen nampung jaku, “enti iya enda ngemediska mata nuan, peda aja meh wai, anang memunyi, anang beduli.”

Lapa alai nuan enggai dibai kami serumpu makai lemai kemari? Ini nyida amat ati meda seduai Wil enggai dibai makai. Kami baru mai enggai ga, baka ke sumbung. Uji kitai baru datai, baru nemuai ke rumah orang anang baka nya, bebasa meh mimit. Enda pen sudi makai tama aja ga ke bilik negu leka asi.”

“Eeh, ukai enggai, kami baru ga badu makai. Dini alai engkah enti udah kenyang. Tambah kami baru datai malu ga deka tama bilik indu dara, enggaika kumbai orang rangka, kumbai orang bam. Persepsi kami enda sebaka enggau minda kita. Kedua, aku semina makai enti maya rapar, ngetu sebedau perut perentung.”

“Nama utai ti dikemalu ke nuan? Enti sigi manah ati, bebasa ke orang wai, dikenudi ke pemalu nya, dulu tama ke bilik, enda pen makai tama meh negu leka asi. Manah nuan enda puni lemai kemari.”

“Malu ke indu dara iya ke bendar.”

“Eh! Nemu malu ke indu ga gamal nuan tu,” ku Miya nyaut sambil michit dagu Andit. Udah nya, “nemu nuan nama lauk kami?”

“Enda, nama lauk kita deh?”

“Utai nya enggau lempis undang.”

“Manah ga aku enda. Aku enggai makai utai nya.”

“Eeh, nya utai ti nyamai, nya utai ke dikenggai.”

“Ukai enggai, utai nya kena pansa leka ensumbar niang aki Andit,” ku iya ngemula. Udah nya nanya, “nyadi aya enggau ibu bemalam di umai wai Miya?”

“Nyadi.”

“Nama kebuah seduai iya bemalam, baka ti rarika aku?”

“Jagung kami selalu dempa kera.”

“Manah enti jagung aja dempa kera, uji enti utai sebelah dalam upih diserungkai nyumbuh tunggal, nyabak apai indai nuan meda bekau jari.”

“Nadai nyumbuh tunggal ba menua kami, kati ba menua kita bisi?”

“Bisi, mayuh, bekedayau aja enti malam.”

“Ni pemesai nyumbuh tunggal Andit?”

“Besai kedua, bisi mesai aku tu. Senah, madi kami ti tuai, baru angkat dara, sema mua mata, rambau nuan tu meh iya, mantap jagung ba pala umai. Umai kami, baka enggi kita, sama di tisi kampung. Iya meh benung tudah tuai ngeruyakka sayuk jagung, nyumbuh tunggal pen ngagai. Meda nyumbuh ngagai, iya lalu belawa pulai ke langkau, ruie-ruie nyabak. Aka Senah belanda nengah madang jagung, nyumbuh belawa niti batang. Semadi ka datai ba langkau baru nyumbuh ngetu.”

“Eh, takut aku ninga jerita nya,” ku Miya nelai sambil ngenggam jari Andit rat agi. Udah minda lepa mimit iya pen nanya sambil murus.

“Enda pedis tubuh nuan bai labuh tadi wai Andit. Aku irau amat ati enggaika nuan tak parai di menua kami. Enti tali putus ulih ga tampung tang enti ati putus, sapa ke nulung?”

“Dini ka enda, rusuk sepiak tu agi berasai pedis, enda tau kena tegu. Sehari-hari tadi enda berasai semadi udah pulai mandi baru iya bisi berasai sengut-sengut,” saut Andit sambil megai rusuk kanan.

“Enti baka nya, manah aku ngunsut iya enggau ubat enda madai niang aki suba. Ubat nya umbas iya pengasi, nadai enda gerai orang ke udah ngena ubat nya. Anang agi bala kitai Iban ti semak tu neh bala Laut ti jauh mayuh datai berubat.”

Seminit udah nya Miya pen angkat ngambi timpa ubat sida iya enda jauh ari peninduk ini Lup. Udah nya iya lalu ngubat rusuk Andit. Sambil ngurut seduai iya pen betelai nampung randau dalam pendiau ti pemadu ngerinduka ati. Udah lama sama enda memunyi, Miya pen nanya.

“Wai Andit! Nama mimpi nuan deka ngelawa aku malam tu?”

“Manah ga mimpi aku Miya. Mimpi gaga begulai enggau mimpi rawan, mimpi merau sangkai di bulan, mimpi nyiruk di lubuk dalam enam, mimpi dasuh niang aki Andit ngiga indu tamang nuan.”

“Nama reti mimpi nya wai?”

“Kenu ku niang aki Bungkuk suba, enti mimpi munyi nya manah, tau diintu, tau dipegawai. Kelimpah ari pemanah bukai, enti bumai tau bulih padi, enti ngayap tau bulih bini,” ku iya beduan Miya.

Ninga jerita Andit munyi nya, Miya pen angkat, gaga lalu duduk, nyeling sambil nanya, “lapa alai nuan enda ngayap ngagai aka Lulu enggau adi Sendi wai Andit?”

“Udah aku ngusung seduai iya tang enda dipalik orang, enda diguna orang aku tu, anang agi deka berandau….deju ke suah agi. Sumbung ga bala kita petunggal, temuai baru datai pen enda dikegaga, enda dipebasa.” Sebedau Miya nyaut Andit nampung,

“Nama pikir kita, semua orang ke ngayap nya bemotif jai magang pia? Anang salah sangka orang bujang wai, manuk dikelala bulu, mensia enda. Enti kita kelalu milih, ujung-ujung enda bulih laki ke menyana kita ila. Anang nesal dudi. Nemu nuan Miya? Ku jaku Sendi muru aku pulai, ‘Pulai alai! lawa nuan aka Miya, enggaika iya ninding’, ku iya enggau nyawa besai sambil ngeju ngasuh pansut.”

“Nama utai ti ngasuh aku ninding, ukai kesulai siku, nadai iya ti manah, iya ti jai mayuh meh terebai sebelah nalan bungai kami dia,” ku Miya.

“Amat munyi ku nuan wai Miya, kesulai ari ili nya beterudus tama bilik kita demalam. Terebai inggap, terebai inggap begintir ganti.”

“Eeh, nadai kami deka besulu enggau bala sida nya,” saut iya sambil ngerendutka jari Andit ke kuyu. Nyau pemuas begaga, beperekuh enggau pangan, seduai iya pen sama lama enda memunyi.

Meniga minit udah nya, ensepi punggung pedis bai berandau duduk, Andit nginsitka tubuh lalu nyandih ba dinding. Nyadi endun nya, meda Andit nyandih, nitih tang jari agi sama rat begenggam.

“Wai Andit, taja pen kitai udah begulai sepagi-pagi tadi tang aku lalu bedau nemu asal nuan amat semina aku ninga mimit ari indai Tik. Tadi, bisi ati aku deka nanya tang enda nyadi enggaika dikeduan aka enggau Sendi. Kitai di rumah panjai ukai tau meda utai ti enda tentu, deka amat beduan pangan,…… diri menyadi pen dikeduan meh.”

“Nama kebuah nuan deka nemu, nemu pen nuan pasal aku nadai meh guna, nadai meh nguntungka nuan. Ni nama aku nemu?”

“Enda.”

“Nama amat aku, Johnny Andit Anak Kendawang. Aki aku nama Tedong, aki ari indai nama Bungkuk. Aki aki aki aku kelia nama Andit, nama gelima aku John, nama aku agi mit Salui. Sali iya meh. Aku ada di Emperan Semah bebatu merekah tingkah tebiang. Di ulu Kerangan endur ikan ngaban dialun gelumbang. Nama aku nya ngangkatka nama aki Andit. Madi aki Andit ti tuai nama Keluping, udah nya baru ini Seludan. Aki Keluping nya meh ke nurunka sida aya Atan. Enti kami sida Wilmat ditesaka ngagai petunggal, pelaba aku, ambis jauh pen empat tauka lima kali.”

“Hai nya! Manah amat nama nuan wai, patut aka beduan nuan di pun nibung pagi tadi,” ku Miya. Baru ingatka Lulu ke ngangau ngasuh ngambi sangkuh kena manchak babi kampung. Udah nya iya nampung, “kati alai aka Tema baka ke nemu nuan nama Sali Andit? Lain pengawa seduai pelaba aku.”

“Endai, kati ku enda nemu deh, aku madahka iya pagi kemari.”

“Enti baka nya udah begulai amat meh seduai deh?”

“Begulai pia-pia.”

“Kati ku nuan, nguai ke orang Andit?”

“Nguai pelaba aku laban menyadi kami ti tuai udah bisi ngibun bilik. Kati alai nuan jampat amat nanyaka utai munyi nya sedangka nya enda relevan enggau pengawa kitai ke begayap. Enti bisi tanda-tanda nuan deka mai aku besulu baru aku ka madah.”

“Yay! Ka iya enda relevan. Sebedau kitai ngaga perambu kitai deka nemu dulu laban leka jaku nguai tau nentuka pengidup dudi hari. Mayuh teladan udah dipeda, rita udah didinga orang ke benung beambai tau pechah tau beserara ketegal apai indai sama enggai alah.”

“Kati kita diri menyadi berapa iku Miya?” ku Andit sambil enda engkekebut ngetatka lengan ke bisi betegu enggau tubuh Miya. Sema jaku, indu nyerungan datai nyengat enda meh lengan iya dikinsitka iya laban rindu ngetatka lengan diri ke bejantil enggau tubuh Miya. Sigi pia meh ba sida ke lelaki maya terubah bediting duduk berimbai. Bendar ngenchadika tubuh ulih betegu. Deka sengaja megai bedau ga berani.

“Kami ka dua iku, aka aku ke tuai udah belaki nguai ke orang.”

“Kati enti sema aku enda nguai deh?”

“Nguai enda nguai nuan sigi aku titih,” ku Miya beduan Andit enggau jaku bungah.

“Baka ni ku kita bekaban enggau sida aya Atan Miya?”

“Indai aku petunggal sa indai Tik. Enti enda kaban dini bilik tau berimbai. Nya alai bilik di rumah panjai betusun nitihka kaban belayan, baka ke enda nemu ga nuan.”

“Enti munyi nya agi ulih tusut meh tua tu.”

“Eeh, enda nemu betusut,” ku Miya nyaut.

“Ukai nya tua ti betusut, ibu Idah enggau indai aku ke benama Selemi,” ku Andit nyaut sambil mampul mulut, nguap deka tinduk. Ke bendar nya ngaga diri deka tinduk ngichaka orang ngasuh gali.

Nyau pengelama berandau, Miya nyau enda nakal berandau duduk, aruh iya, jam kuan Andit benung nunjuk pukul tiga pagi. Sida burung, jelu, riuh, sida buntak apai salui nyau nadai agi memunyi, kengka ke munyi utai ti agi didinga seduai iya semina munyi kaki uduk aja ti agi bisi bekesetuk ngaru pending. Ensepi mata ngantuk, Miya lalu ngerebahka diri sambil jari sama begenggam enda beleka. Nyadi tudah Salui, meda siku nya gali lalu nyandih ba panggal beserak dua sambil nanya.

“Manah amat bau minyak nuan wai, udah ga kuyu nuan bau rengut,” ku iya nelai, “ngasuh ati aku udu agi beraie.”

“Minyak poison madi aku, enti aku, nyampau meh tebelika minyak ngemar nya, duit ti ulih aku mutung semina chukup ke belanja aku sekula. Apai, sekumbang lengan iya ke udah tebelasuk bai nyangkul kebun lada kami di seberai din nadai ulih ngereja nyelutung, nadai ulih mutung. Arapka indai, ukai indai tegar, ambis mayuh pen empat kelapis ulih kendua iya sepagi. Dini nya ka chukup deh. Nambahka nya, padi kami taun siti nyin kemari enda tentu nyadi laban ti diayahka empangau enggau buntak Sali. Nya alai kena ngidupka diri kami tepejal nachu. Bepun ari nya meh pendiau kami sebilik baka pemedis datai betinggang, baka pemerinsa datai beulang,” ku Miya nerang ambis penyinu enggau linang ai mata labuh ninggang panggal.

Meda siku nya kelalu emosenal, Andit lalu ngendas kuyu enggau perecha kait ti bau minyak santalia. Ninga serebana pemerinsa indu begiga ke duit dua tiga ringgit, Andit ngenung enda lama laban ngenang diri empu sama baka nya. Taja pen rega getah pera dua ringgit sekati tang pengawa nya enda tesenangka mensia di rumah panjai. Pengidup mensia ba sekeda menua di Sungai Rungan enda sesalah kair pantuk baka manuk, kair pagi empa pagi, kair lemai empa lemai.

Nyau kepuas-puas ningaka jaku Miya nusi pemerinsa sida iya, Andit pen lelap lalu tinduk. Tinduk gegaring enda kekebut baka lumpung mulung nganti ke diperingga.

“John! John! Lapa alai nuan enda memunyi. John, I love you, p..l..e..a..s..e…Johnny p..l..e..a..s..e!” Ku Miya nelai sambil ningkap ba dada. Udah nya iya pen nambah.

“Eeh! Nyau jenak amat ga Johnny tu tinduk, aku agi deka berandau, agi deka besulu iya ngenindukka diri. Enda kala meda orang peninduk baka iya tu,” ku iya ringat sambil nguyat.

Udah nya iya lalu ngetu bejaku. Lebuh ke ngetu iya pen limpang nyimpan kelip buk ke tisi dinding ninggalka Andit ti lelakak tinduk telentang. Meda siku nya lalu enda kekebut iya pen ngenindukka diri bepanggalka lengan, bebungkur sama sepua baka anak chauk ke tinduk ba tinin indai sida iya. Tinduk sama jenak, taja pen berimbai tang nadai utai ti ngenangika ati, nadai pengawa ti tau ngasuh sida keranjur tepejul…….

Jam pukul lima setengah. Manuk beterauh engkukuk gagaka hari deka tawas. Tekenyit ninga nyawa manuk aki Jungup engkukuk di baruh geregar, Miya dani, duduk lalu mulaska pending Andit. Taja baka nya, Andit enda pedis ati laban nya endang baka gagai nembiak di rumah panjai, menawa ngetil, menawa nempik, menawa mechal tubuh pangan enti maya gidan. Sambil musil sambil nguyat, lebuh nguyat, ngerak.

“Dani wai Andit, dani! Hari nyau deka kerebak tawas teringkas siang, legi malu nuan dipeda bala sida ti angkat bekindu.”

Meda Andit lalu enda dedani, iya majak ngerak sambil ngelichik dada. Meda Andit enda ga dani, Miya lalu nebah ruding kachai ba pending. Macham-macham meh munyi tebah, enda ga Andit dani.

“Beli Andit tu, enda nemu ningaka ruding, orang bujang palui,” ku iya muchau.

Iya ke bendar, Miya enda mega tentu nemu nebah ruding laban lelaki enggau indu rambau sida tu nadai belajar nebah ruding. Tambah apai indai sekalika diri menyadi enda ngajar bala anak, bala menyadi nebah ruding. Sida iya nemu nebah enggau chara automatik. Nemu ari pangan sekalika ari ambai. Kenu ku teori sida ke tuai, nebah ruding enggai nyadi diajar ngagai bala diri sebilik laban leka jaku ti dikena berandau mayuh ngena leka jaku beambai, leka jaku pengerindu. Nya alai, ketegal ke enda dipeturunka ngagai sida ti biak, nya ke tau ngasuh budaya nebah ruding deka pupus ditelan jeman. Sinu ga kitai ngenang anak Iban di menua Sungai Rungan enggau di menua bukai jemah ila enda nemu nama utai ti dikumbai orang ruding. Anang agi deka nebah, meda pen engka enda meh ngelala. Enti sema meda pen, kada enda kumbai sida iya replika dilah pejatan tauka kejatan, meda engkeraju bedilah di tengah tubuh.

Nyadi Miya ti ngerak, majak meh ngelichik, majak meh ngeremuk tubuh Andit. Nyau kepuas-puas nguyat tubuh, Andit pen sedar, ngeliat, malik ke kiba malik ke kanan.

            “E.e.eeh, dini endur aku tu, nama pengawa aku, amat ka sekalika ngigau,” ku iya enda bechayaka diri dikegagaka indu dalam ‘realiti’ ke ukai realiti. Fantasi dalam fantasi. Baka ke enda nemu diri udah ditabanka semengat terebai ke langit mit mesai kepit bingkai sintung, enchayak ke selepak remang begantung.

Udah nya iya pen duduk, angkat belubah-lubah, misin buk enggau jari lalu nyebut, “biso ga sampi kitai mensio enti difokasko muo indu enggau mindo ti ikhlas,” ku iya bejaku dalam ati nunda tiun jaku aya iya Engkechup. Benung bejaku iya mega nyium kening Miya sambil murus. Baru deka nampung jaku, Miya pen nyengkaukka jari ke pakuh Andit, nyempilka mulut ke pending lalu nelai begadai-gadai enggau nyawa meresu penuh pengasih.

“I love you Johnny, please John please, I love you,” ku iya dulu nyebut sambil maut pegu Andit enggau mua iya pengerapit, dalam Andit ngisin diri isu.

Taja Andit ngaga diri enggai nyaut tang Miya ulih macha minda ti tependam dalam ati. Enda telalai. Ari enjun lempuang enggau pengangat tubuh lebuh beperekuh sapa enda ngasai…... Lain bendar ga ke sekali tu klon sigi enda seratus peratus sebaka enggau ori. Johnny Andit klon enda ngenyai runding Johnny Andit orijinal ari Rumah Yanis di Emperan Semah senentang chara iya ngetan panjuk masang amba. Enti Johnny Andit ke amat, pama Miya udah merekuh naka pengerapit baka nya,….lampu trafik udah gadung, kerita sigi dipechut penapat inat laban enti enda pia, enggaika jelungan. Ujung-ujung puntan baka menasan jalai jelu.