Johnny Anak Chuat

Pansut ari karung mengada ba menua ke dikumbai Nanga Menyebat, iya nya siti menua ba ulu Batang Lemanak pegai menua sitak Engkilili. Ai Lemanak mati ba ai Batang Ai tauka Batang Lupar lalu nanga Lemanak tu enda jauh ari ili pasar Engkilili. Nanga Menyebat tu siti menua urung tengan Batang Lemanak, lalu semina ulih dilawa ngena perau panjai laban bedau bisi jalai raya. Jaku kami Batang Lemanak nyadika identiti aku enggau sekeda bakih aku laban aku tetap aku! 'Slang' jaku kami di Batang Lemanak bebida ari 'slang' jaku menua bukai. Menua Lemanak sigi menua aku, nya alai, jai manah tetap penatai aku! Enti sema bisi orang nyebut jai, aku tetap ngumbai manah!

 

 

 

Munyi tauka

Jalai raya ari simpang Lubok Antu ke pasar Lubok Antu bisi meraka batang Lemanak ba jematan Lemanak urung menua ke dikumbai Sebeliau. Dia mih penyangkai semua raban kami ke ari ulu nyin lebuh ti undur ke pasar Engkilili. Kira mengempat taun ke lalu, bisi jalai raya digaga ngulu Batang Lemanak, nangka menua ke dikumbai Lubok Subong. Berindik ari nya, penyangkai kami pan lalu berubah ke Lubok Subong datai ke diatu.

Penyangkai kami ba Lubok Subong

Penyangkai tu mih penyangkai kami ke ari menua ulu Lemanak. Merau ari tu bisi 5 jam ke rumah panjai kami ke ulu kin.

Merau di menua kami

Tu mih pengidup kami. Jarang endar meda tauka nepan utai ke dikumbai kerita. Merau anang ngira, agi telanjai suba pan endang udah pandai besuar nanjak wung.

Ai menua kami

Enti enda pandai merau, anang deka nguji, tang aku udah chukup teleba. Dibai mudik wung Niagara ba Kanada pan aku nemu pelaba aku.

Restoran kami

Jauh ke nemu utai ke disebut KFC tauka Sugar Bun, kerangan nya mih restoran kami.

Pinggai kami

Ngena siduk enda tentu teleba, laban suah agi ti makai ngena daun. Asi suah agi dibai ngena upih. Nya mih pendiau kami orang ulu.

Nguan lemai

Maya ke enda nyempulut, kami rindu begelumu berandau pasal umai kebun pama ngingit nyau deka berengkah memunyi.

Merau ngena injin sepit kuda 15 ari Lubok Subong ke rumah kami bisi mengelima jam lebuh ai langkang. Nya alai aku landik amat besuar enggau bebatak. Udah sebulu enggau ai. Dibai betapat nyelam tauka nyemerai ngelaban 'dolphin', menang angka bedau temu tang enda mih aku surut. Sema jaku, enti dibai merau nanjak wung Niagara ba Kanada pan aku sanggup!

 

Maya ke mudik, suah endar tepedaka raban nyumbuh raban kera bejelangkit sebelah puchuk mengeris. Kekadang bisi ga meda sida kijang sida rusa nyemerai ngelayang ai. Babi kampung pan pia mega, kekadang beteruik didinga ngekah buah empili sebelah emperan ke petang. Petang laban kayu kampung ke meniga pemerap nya endang agi mayuh. Enggai ga bula, nadai ga kayu ke besai ke tau disema ke sehari pukang melit! Nya nandaka aku endang anak chulin menua ulu. Dani pagi, sema jaku agi didinga rauh sida empeliau arang di puchuk keladan. Agi semak enggau palan sida burung ruai.

mandi.

 

Nya alai, malu bendar ga asai tudah diri enti dibandingka enggau raban kita pemacha ke ditu laban pelaba aku kita tentu jauh nemu ari aku pasal perengka ke dikumbai komputer enggau internet. Nyangka kita agi mit udah teleba enggau video game, tang enggi tudah diri, dini kala ninga utai munyi nya. Enggai enda enggai pan bebuti di rumah panjai, bemain sumpit pangan diri enggau buluh engkalat. Sigi nya mih main dikena muai awak ba menua ulu baka kami.

Nguan lemai

Betunga enggau semua. Tuai biak endang dirandau magang. Enda siku, siku ga tau meri penemu. Jaku enda tau ngelangkah langit enggau orang

Ulu Engkari

Maya ti nemuai ngagai kaban belayan di Ulu Engkari. Enti kitai bedarat ari entigis ai Engkari, melunggang ke sepiak, dia kitai deka rembus ba Ulu Katibas.

Nguan lemai

Bejerita enggau sida ke tuai enda tau enda enti kitai deka nemu adat enggau pendiau asal kitai. Nama pemali meda kijang maya kitai nurun ke umai?

Nguan lemai

Ukai berandau ke pasal virus komputer. Ukai mega nanya ke reti sereta tuju teknologi nano, tang betanya ke reti burung ba pengarap bansa Iban

Nguan lemai

Tu mega ukai ngenang laman web tauka blog, tang nanya ayu mimpi nama reti enti kitai mimpi begulai enggau Bungai Nuing di Panggau Libau?

Leman dunya

Ukai berandau pasal karrier nyadi model majalah Vogue, Cosmopolitan tauka Her world, tang betusut, ngiga tampuk penatai bansa Iban.

Kami menyadi bisi enam iku, tiga lelaki lalu tiga iku indu. Aku ke nombor lima, lalu ke suah agi dirara. Suah diperak apai enggau indai maya agi mit suba, Nya alai suah disebut sida, semina ke enda tumbuh iku! Maya agi mit aku rindu nyetik, nyempulut, manjuk enggau berikan. Rindu begiga ke buah kemunting, buah lemba, buah senggang, buah entimau sebelah temuda. Suah bejalai sebelah kampung jerung, teleba ngerambing bukit, nurun lebak niki munggu.

 

Maya bisi ninga auh munyi bilun engkabang tauka eroplane mansa gumpal remang di rumah panjai, kami rindu beterauh berebut belanda ke tanju tauka tengah laman enggaika enda ampit meda bilun. Kenu ku ati, enda ibuh ke nepan bilun, negu aja pen udah chukup enti ulih.

 

Maya primari, aku besekula ba SRK Nanga Menyebat, Ulu Lemanak. Udah nya aku pindah ngagai SRK Abang Aing, Sri Aman. Lebuh ba sekondari, aku besekula ba SMK Datuk Patinggi Kedit, di Betong. Pengudah nya aku pindah ngagai SMK Datuk Patinggi Haji Abdul Gapor, Stampin di Kuching. Pengudah SPM, aku ampit besekula enda lama di Kolej Abdillah, Kuching, lalu udah nya ampit mega enda lama ba UITM Shah Alam. Enda lama, enda aku bula...... !!

 

Pengelama ke udah idup ambis utai diserungkai, mayuh utai dipeda, diteresa lalu ditengah, aku mega bisi nemu mimit pasal pengawa Broadcasting, Journalism & Communication, Publishing. (Enda mega bula, aku enda kala belajar ba University nya......). Berindik ari penemu ke mimit nya, aku lalu bisi ati deka nguji nengkebang pengawa ti bekait enggau 'Journalism & Communication', nya alai lalu ada mih PEGARI IBAN PRODUCTION dalam taun 2002 ti diketuaika aku empu. Kelimpah ari ti bejalaika pengawa Pegari Iban Production, aku mega gawa ba kompeni menua Kanada ti bepampang opis ba tingkat 32, Menara Citibank, di Jalan Ampang, Kuala Lumpur nyentuk ke diatu.

 

Ari pengeras ati enggau runding diri, aku mega udah ngasilka Novel Iban KEMAYANG PENGERINDU sereta bup Gempung Jerita Tuai Bansa Iban. Bup tau tau dipesan ari kami.

 

Runggu Burung Empitu

Tau dikenchadika nyagu maya nimang. Tang tau ga alai betanya pasal 'black hole'.

Nadai komen

Rindu ati

Di rumah panjai

Miring

Ukai semina nemu miring enggau bebiau, tang tau ga enti deka nguji nanya aku pasal teori Darwin. Tau mega berandau enggau aku pasal formula Albert Einstein, E=mc2.

Gamal

Taja gamal jai, tang ati chukup sigat.

Pelaba aku, sekeda kita pemacha ke benung macha bup tu tentu bisi kena uji Petara enggau penguji baka enggi aku. Penguji ti ku aku tu suah meri aku runggu sinu ngenang, ngasuh aku nyedan baka ke pechah bungkan jebul pemandang. Kebuah pia, laban aku chukup sinu ngenang diri enda sempat malas budi apai enggau indai aku ti nupi kami menyadi kenyau ari mit.

 

Indai aku ruat peraka urat sebangki api, tumbang tinggang batang tebelian wi, suyak tinggang karak kepayang padi, betikaika rau rangkai keranjai indai imbuk kedidi lebuh aku agi besekula lalu apai aku lesi bebadi ke leti lindung tiang, pulai ke gensarai redak tenchang, danjan sulai lenyau ari baruh pun sandau liau ke kekitau nyari lang, danjan sulai lela ke bedega nyarang takang lebuh aku baru berengkah gawa.

           

Ketegal nya, aku chukup sinu ngenang seduai iya enda ampit makai, ngena tauka ngasaika utai ulih aku. Ketegal penguji Petara tu mega, seduai iya sama enda ampit meda menantu ke sulu anak andai, enda sempat mangku bala uchu ke tau betiu ngumbai makai, enda sempat bebuti enggau bala isan diri ngerami gawai.

 

Nangka tu dulu wai menyadi. Enti bisi utai tanya, anang sanggu nanya. 

 

TR. Mujah, Nanga Menyebat, Ulu Lemanak, 95800 Engkilili.

Surat elektronik: johnny@pegari.com.my

Telefon binching: 019 875 8576